Psalms 84

Kuionea Shauku Nyumba Ya Mungu

(Kwa Mwimbishaji: Mtindo Wa Gitithi. Zaburi Ya Wana Wa Kora)

1 ^aEe Bwana Mwenye Nguvu Zote,
makao yako yapendeza kama nini!

2 ^bNafsi yangu inatamani sana,
naam, hata kuona shauku,
kwa ajili ya nyua za Bwana;
moyo wangu na mwili wangu
vinamlilia Mungu Aliye Hai.

3 ^cHata shomoro amejipatia makao,
mbayuwayu amejipatia kiota
mahali awezapo kuweka makinda yake:
mahali karibu na madhabahu yako,
Ee Bwana Mwenye Nguvu Zote,
Mfalme wangu na Mungu wangu.

4 Heri wale wanaokaa nyumbani mwako,
wanaokusifu wewe daima.

5 ^dHeri wale ambao nguvu zao ziko kwako,
na njia ziendazo Sayuni zimo mioyoni mwao.

6 ^eWanapopita katika Bonde la Baka, ▼

▼ Yaani Bonde la Vilio.

hulifanya mahali pa chemchemi,
pia mvua za vuli hulijaza kwa madimbwi. ▼

▼ Au: baraka.

7 ^hHuendelea toka nguvu hadi nguvu,
hadi kila mmoja afikapo
mbele za Mungu huko Sayuni.

8 ⁱEe Bwana Mungu Mwenye Nguvu Zote, sikia maombi yangu;
nisikilize, Ee Mungu wa Yakobo.

9 ^jEe Mungu, uitazame ngao yetu,
mtazame kwa wema mpakwa mafuta wako.

10 ^kSiku moja katika nyua zako ni bora
kuliko siku elfu mahali pengine;
afadhali ningekuwa bawabu katika nyumba ya Mungu wangu
kuliko kukaa katika mahema ya waovu.

11 ^lKwa kuwa Bwana ni jua na ngao,
Bwana hutoa wema na heshima;
hakuna kitu chema anachowanyima
wale ambao hawana hatia.

12 ^mEe Bwana Mwenye Nguvu Zote,
heri ni mtu yule anayekutumaini wewe.